Könnun mánaðarins

Hvað af eftirfarandi hræðist þú mest?
 

Vissir þú að ...

Það að horfa á stjónvarp í svefnherberginu eykur líkur á svefnerfiðleikum og svefnleysi.
Veðrið og önnur margbreytilegheit Skoða sem PDF skjal Prenta út Senda hlekk á þessa síðu til vinar
Einkunn notenda: / 0
LélegGóð 

„Loksins sér til sólar”, “Það er alltaf rigning”, “Sjötta sólarminnsta sumarið frá..”, “Þetta er verra en um þettaleitið í fyrra”

Gamall frændi, sem oft gerði grín að barlómi tíðarandans, sagði við mig þegar ég var lítil: “Þegar þú verður orðin gömul kona, þá munt þú segja barnabörnunum frá því, að þegar þú varst krakki, þá hefði verið til stórt, gult, yndislegt fyrirbæri á himninum, sem gaf frá sér birtu og yl og var kallað sól”. Okkur hættir stundum til að ýkja það neikvæða og einnig að taka persónulega því sem við höfum ekkert með að gera; “Gat nú verið! Ég er komin í frí og þá er hellirigning” Þarna væri ég að gera mig að miðpunkti sem veðurguðirnir fylgjast náið með!

Galileó heyrðist tauta  “Hún snýst nú samt” þegar hann gekk frá rannsóknarrétti kirkjunnar í Róm, þar sem hann varð að bjarga lífi sínu með því að afneita eigin niðurstöðu um að jörðin væri ein af fjölmörgum reikistjörnum sem snérist í kring um þá stóru gulu; Umheimurinn var ekki tilbúin að láta af þeirri sjálfmiðun að jörðin væri miðja alheimsins sem allt annað snérist um.

Þannig verðum við mannfólkið stundum í vanlíðan; á vissan hátt frumstæðari, og okkur hættir til að einfalda hlutina í svart-hvítt. Jafnframt verðum við þröngsýnni og sjálfmiðaðri; Ég sé tvo tala saman og hugsa  “Þeir eru örugglega að tala um mig”.

Börn eru oft krúttlega sjálfmiðuð eins og drengurinn sem missti hundinn sinn. Voffi varð fyrir bíl og fór upp til guðs. Nokkru síðar gengu hann og yngri frændi hans fram á dauðan fugl og sá litli hryllti sig og sagði “Af hverju tekur guð hann ekki?” En hinn sagði “Oh, þú ert svo vitlaus - hann er með hundinn minn núna!”

Tveir menn gengu sömu ströndina og annar uplifði flott mynstur í ósnortnum sandinum eftir útfallið, en hinn andsk..... fnykinn af frárennsli úr fjósi bænda sem leitt var niður á fjörukambinn. Sumir sjá glasið hálffullt en aðrir hálftómt.   Við festumst stundum í vítahringvanlíðunar; neikvæðum hugsunum sem leiða til vanlíðunar og vanlíðan eykur líkur á neikvæðum hugsunum. Ergelsi, kannske mest við sjálfan sig, breytir eigin líðan til verri vegar en engu um ástandið.

Við ráðum oft ekki aðstæðunum - hvaða spil við fáum á hendur, en heilmiklu  um það hvernig við spilum úr þeim. Væri gott að verða aldrei fyrir andstreymi eða mótlæti? Væri gott að alltaf væri sumar og sól? Ef svarið er „já“, þá kannske velur þú að flytja til Spánar.Hefurðu annars tekið eftir hvað litirnir í náttúrunni eru fallegir eftir rigningu? Neongræn mosaröndin meðfram læknum og litlar, bleikarvarir lambagrassins á sandmel hálendisins eru „raritet“ sem vekja kannske meiri aðdáun en litrík flóra blómabúðanna.

Er ekki farsælast að sníða sér stakk eftir vexti og velja hlífðarföt eftir veðri; að styrkjast og njóta þess að vera til í alls konar aðstæðum - mótlæti jafnt sem meðbyr?  Það eru jú ekki aðstæðurnar, veðurfarslegar eða í lífinu almennt, heldur hvernig við bregðumst við þeim sem hafa mesta vægið!

Heiðdís Sigurðardóttir sálfræðingur